E ardhmja e sulmuesit francez Karim Benzema ka marrë një kthesë të papritur te Al-Ittihad, ku raportet mes palëve janë përkeqësuar ndjeshëm pas një oferte rinovimi që pala e lojtarit e ka konsideruar “absurde”.
Megjithëse fillimisht u përfol për një kalim të mundshëm te Fenerbahce në Turqi, Al-Ittihad bllokoi lëvizjen duke deklaruar se francezi nuk do të largohej.
Megjithatë, gazetari Yagiz Sabuncuoglu raporton se 38-vjeçari ka arritur tashmë një akord personal me rivalët e Al-Hilal, pa marrë më parë miratimin e klubit të tij aktual.
Duke qenë se kontrata e ish-sulmuesit të Real Madrid skadon në verën e këtij viti, topi mbetet në fushën e kampionëve të Arabisë Saudite, të cilët duhet të vendosin nëse do të lejojnë transferimin e tij te rivali i drejtpërdrejtë.
Situata mbetet e tensionuar ndërsa pritet vendimi përfundimtar i klubit verdhezi për fatin e yllit transalpin.
