Dinamo ka arritur një nga sukseset më të mëdha në historinë e saj europiane, duke eliminuar Hajdukun e Splitit dhe duke u kualifikuar për herë të parë në fazën “play off” të Ligës së Konferencës.
Skuadra e drejtuar nga Ilir Daja do të përballet tani me polakët e Jagiellonias. Kalimi në këtë fazë i siguron klubit minimalisht 1.275 milionë euro nga pjesëmarrja në tre ture të kompeticionit.
Kjo shumë konsiderohet e rëndësishme për financat e klubit, që synon investime të reja për të zëvendësuar lojtarët e larguar gjatë verës. Pavarësisht rezultatit kundër Jagiellonias, Dinamo ka tashmë një bazë të fortë financiare dhe një arritje historike.
Presidenti Ardian Bardhi ka shpërblyer lojtarët për sukseset e arritura, duke akorduar rreth 150 mijë euro premio.
50 mijë euro janë shpërndarë për kualifikimin ndaj Atletik d’Eskaldes, ndërsa 100 mijë euro për suksesin ndaj Hajdukut. Ky motivim financiar pritet të shërbejë si nxitje për ndeshjet e ardhshme.
