Trajneri i Kosovës, Franco Foda, ka publikuar listën e futbollistëve të ftuar për ndeshjet miqësore kundër Republikës Çeke dhe Andorrës, ku pjesë e saj është edhe qendërmbrojtësi Ron Raçi.
Përfshirja e 23-vjeçarit mbyll diskutimet e periudhës së fundit mbi një kalim të mundshëm të tij te kombëtarja e Shqipërisë, duke konfirmuar qëndrimin e lojtarit te “Dardanët”.
Raçi u transferua në verën e vitit 2025 nga skuadra e Prishtinës te Hajduk Spliti në kampionatin kroat, për vlerën e 300 mijë eurove.
Sa i përket karrierës ndërkombëtare, mbrojtësi ka regjistruar paraqitjen e tij të parë me fanellën e Kosovës në qershor të vitit 2025, gjatë një ndeshjeje miqësore të zhvilluar kundër përfaqësueses së Komoros. Kjo ftesë konfirmon statusin e tij si pjesë e planeve të stafit teknik për sfidat e radhës.
