Trajneri Naci Sensoy ka njoftuar mbylljen e bashkëpunimit me skuadrën e Laçit. Lajmi për këtë ndarje është konfirmuar zyrtarisht nga vetë tekniku përmes një postimi në profilin e tij në rrjetin social Facebook.
Nën drejtimin e tij, skuadra kurbinase arriti të shpallej kampione e Kategorisë së Parë dhe të siguronte ngjitjen në Superligë, pasi mposhti Skënderbeun në finalen e kampionatit. Përgjatë këtij edicioni, ekipi regjistroi një ecuri pa asnjë humbje, ku në 24 ndeshje zyrtare arriti 19 fitore dhe 5 barazime.
Sensoy bëri me dije se vendimi për të mos rinovuar kontratën për sezonin e ri është marrë me shpresën se do të shërbejë në të mirën e të dyja palëve.
Tashmë klubi laçian duhet të nisë punën për gjetjen e një stafi të ri teknik për aventurën e ardhshme në elitën e futbollit shqiptar.
