Drilon Hazrollaj mbetet një nga emrat më të përfolur të kësaj periudhe transferimesh, teksa kalimi i tij te Tirana nuk është finalizuar ende.
Sulmuesi 22-vjeçar, i cili vazhdon të jetë pjesë e Rapid Bukureshtit, mbeti në stol në ndeshjen e fundit ndaj Sepsit, ndërsa negociatat mes klubeve po vazhdojnë.
Pengesa kryesore në bisedime ka qenë mbulimi i pagës së tij prej 9 mijë eurosh në muaj, si dhe diferenca në vlerësimin e kartonit, ku rumunët kërkonin 900 mijë euro.
Megjithatë, te kampi bardheblu mbizotëron optimizmi dhe ata besojnë se ish-sulmuesi i Malishevës do t’i bashkohet skuadrës gjatë fazës përgatitore në Turqi. Ish-talenti i akademisë Ramiz Sadiku shihet si një përforcim ideal për projektin e ri të Tiranës pas një sezoni zhgënjyes ku përfunduan në vendin e gjashtë.
Hazrollaj u transferua te Rapidi për rreth 1 milion euro pas formës së lartë në Kosovë, por aventura e tij në Rumani nuk shkoi sipas parashikimeve. Menaxheri i lojtarit, Kastriot Telaku, konfirmoi se marrëveshja me Tiranën nuk ka dështuar, megjithëse po shqyrtohen edhe opsione të tjera.
