Redon Xhixha mund të largohet nga Belouizdad më shpejt nga sa pritej, duke mbyllur një tjetër kapitull zhgënjyes në karrierën e tij.
Nga Algjeria raportohet se sulmuesi shqiptar ka kërkuar vetë largimin, pasi nuk ka arritur të përshtatet me ekipin dhe ambientin.
Mungesa e aktivizimit në dy ndeshjet e fundit e ka bërë situatën edhe më të rëndë emocionalisht për të. Ky përjashtim nga ekipi, i pret atij biletën.
Largimi tashmë duket vetëm çështje kohe, një fund i paralajmëruar për një aventurë pa shkëlqim.
27-vjeçari po përjeton një rënie të ndjeshme që prej vitit 2023, kur Tirana vendosi ta shesë te Qarabag me shpresën për një hap përpara. Që prej asaj kohe, minutat në fushë kanë qenë të pakta dhe besimi është venitur.
Është e dhimbshme të mendosh se bëhet fjalë për të njëjtin Xhixha që u shpall lojtari i vitit 2022 në Shqipëri.
Largimi nga Belouizdad mund të jetë një fillim i ri për të. Në këtë kuadër, Xhixha pritet të kthehet si një opsion serioz për klubet e Superiores në merkaton e janarit, me shpresën për të ringjallur karrierën e tij.
