Al Nassr është kualifikuar në finalen e Superkupës në Arabinë Saudite. Skuadra ku luan edhe Cristiano Ronaldo, triumfoi 2-1 ndaj Al Ittihad në gjysmëfinale.
Titullar në këtë takim luajti edhe futbollisti i Kombëtares, Mario Mitaj tek Al Ittihad. Sadio Mane i dha avantazhin Al Nassr në minutën e 10-të, para se Bergwijn të barazonte shifrat 6 minuta më vonë.
Senegalezi megjithatë la ekipin e tij me 10 lojtarë, pasi u ndëshkua me të kuq në minutën e 25-të.
Në fraksionin e dytë, edhe pse në inferioritet numerik, Al Nassr, ia doli të shënojë golin e fitores, me anë të Joao Felix në minutën e 61-të, pas një asisti nga Ronaldo.
Në finalen e Superkupës, Al Nassr do të përballet me fituesin e çiftit Al Ahli-Al Qadsiya. /tvklan.al
