Kukësi po përgatitet për finalen e rëndësishme të “play-out” kundër Bylisit B, pasi e mbylli sezonin në Kategorinë e Parë në vendin e dhjetë.
Megjithatë, mbijetesa e verilindorëve nuk varet vetëm nga rezultati i tyre direkt në fushë, por edhe nga fati i ekipit të parë të Bylisit në Superiore.
Sipas rregullores, dy ekipe të të njëjtit klub nuk mund të luajnë në të njëjtën kategori, gjë që favorizon Kukësin.
Në rast se ekipi i parë i ballshiotëve bie nga elita, Bylisi B do të zbresë automatikisht në Kategorinë e Dytë, pavarësisht rezultatit në finalen e “play-out”.
Aktualisht, ekipi i parë i Bylisit gjendet në vendin e parafundit në Superiore, duke rritur shpresat e Kukësit për të qëndruar në Kategorinë e Parë.
Kështu, kuksianët kanë dy rrugë për të shpëtuar sezonin: fitoren e finales ose rënien e rivalëve nga kategoria kryesore.
