Plymouth e mbylli sezonin në “League One” me një përmbysje fantastike 2-3 ndaj Northampton, falë një performance spektakolare të Lorent Tolajt.
Edhe pse ekipi u gjend në disavantazh të dyfishtë, sulmuesi shqiptar mori frenat e lojës në dorë duke shënuar golin e parë dhe më pas duke asistuar për barazimin e përkohshëm, në një javë të fundit që vulosi formën e tij të jashtëzakonshme.
24-vjeçari mbyll kështu një vit statistikisht mbresëlënës, me plot 18 gola dhe 8 asistime në kampionat, shifra që e rendisin atë në majat e listës së golashënuesve dhe kontribuesve më të mëdhenj në ligë.
Në total, duke përfshirë edhe katër golat në “EFL Trophy”, Tolaj e mbyll sezonin me 22 realizime, duke qenë lojtari më produktiv i Plymouth.
Edhe pse ekipi nuk ia doli të siguronte ngjitjen në Championship, performanca e sulmuesit që ka përfaqësuar moshat e Zvicrës pritet t’i sigurojë atij një lëvizje drejt një klubi më të madh gjatë merkatos së verës.
