Niveli i pagave për futbollistët e kampionatit shqiptar është rritur ndjeshëm këtë sezon, kryesisht në ato klube që kanë pretendime madhore. “Rubrika Sportive” ka bërë një vëzhgim për rrogat e lojtarëve në klubet e Superiores dhe ka zbuluar se dy prej tyre bëjnë diferencën.
Rekordin e mban 30-vjeçari spanjoll i Flamurtarit, Hoze Rodriguez. Mesfushori merr rreth 20 mijë euro në muaj dhe është praktikisht futbollisti më i paguar i kampionatit shqiptar. Rodriguez erdhi ne Vlorë si një ish-lojtar i Real Madridit në vitin 2012, ndërsa në sezonin e kaluar ishte pjesë e klubit të Superligës turke, Adana Demirspor.
Në këto tetë javë kampionat, çuditërisht spanjolli nuk ka luajtur asnjëherë 90 minuta dhe për më tepër as nuk është grumbulluar në tri ndeshjet e fundit. Por kush është “pasaniku” tjetër në “Abissnet Superiore”?
Sulmuesi i Dinamos, Bernard Berisha, merr një pagë rreth 15 mijë euro në muaj, duke qenë lojtari i dytë më i paguar i kampionatit. Berisha u rikthye në Superiore pas gati një dekade aktivizim ne kampionatin rus. Në javët e fundit 34-vjeçari ka qenë si rezervë luksi te Dinamo, pasi në pozicionin e sulmuesit të majtë, trajneri Ilir Daja preferon si titullar Dejvi Bregun.
