David Fadairo shkëlqeu me fanellën e Dinamo City-t në kompeticionet evropiane, ku arriti të shënonte në tri ndeshjet e fundit, përfshirë dy gola përballë Pafos-it.
Pas përfundimit të huazimit, 25-vjeçari do të kthehet te Partizani, klub që ndërmori një risk të madh me këtë lëvizje. Për shkak të rregullores së UEFA-s, e cila lejon një lojtar të aktivizohet me vetëm dy ekipe të ndryshme gjatë të njëjtit sezon, aktivizimi i tij me Partizanin eliminon çdo mundësi tjetër transferimi në merkaton e janarit.
Në rast se “Demat” nuk realizojnë shitjen e tij deri më 1 shtator, opsion i vetëm për një lëvizje gjatë dimrit do të mbetet vetëm rikthimi te Dinamo. Vetë sulmuesi ka konfirmuar se ofertat në drejtim të tij nuk mungojnë pas paraqitjeve mbresëlënëse në arenën ndërkombëtare.
Në të njëjtën situatë burokratike ndodhet edhe Rrok Toma, i cili dha kontributin e tij te Vllaznia gjatë ndeshjeve evropiane.
