Jorgo Pëllumbi mbylli një sezon të suksesshëm me Dritën në Kosovë, ku u shpall edhe kampion. Mbrojtësi korçar ishte një nga më të spikaturit e ekipit, ndërsa rezultoi edhe si një nga lojtarët më të vlerësuar në Superligë.
Përveç kësaj, Pëllumbi tregoi formë të shkëlqyer edhe në Conference League me Dritën. Merkato e verës, mund të sjellë ndryshime për 25-vjeçarin. Mësohet se në gjurmët e tij janë vënë disa ekipe të huaja. Konkretisht bëhet fjalë për dy klube europiane dhe një ekip nga Rusia.
Pëllumbi ka kontratë deri në vitin 2027 me Dritën, por nuk përjashtohet mundësia e një shitje në verë, nëse vjen oferta e duhur për të dyja palët. Mbrojtësi ka pasur një karrierë të suksesshme, në klubet ku ka luajtur. Pëllumbi e nisi me të rinjtë e Skënderbeut, ndërsa luajti dhe me ekipin e parë.
Po ashtu ka luajtur edhe me Kukësin në Shqipëri, ndërsa numëron edhe 85 ndeshje me Varazdin në Kroaci. Në 19 ndeshje, luajti edhe me Debrecenin në Hungari. Mbetet të shihet nëse pas merkatos se verës do të qëndrojë te Drita apo do të nisë një aventurë të re. Gjithçka do të varet nga ofertat e klubeve të interesuara për shërbimet e Pëllumbit.
