Vendimi i trajnerit Silvinjo për të lënë jashtë listës së 23 lojtarëve Jasir Asanin për ndeshjen ndaj Polonisë ka shkaktuar diskutime të mëdha.
Ndonëse 30-vjeçari është i vetmi lojtar në grumbullim me profilin natyral të një sulmuesi të djathtë, tekniku brazilian zgjodhi ta dërgonte në tribunë së bashku me Nazmi Gripshin dhe Klisman Caken.
Pas këtij lajmi të papritur për lojtarin që ishte protagonist absolut në kualifikueset e kaluara, ka ardhur edhe reagimi i parë i Asanit.
Përmes një postimi në InstaStory, sulmuesi ka publikuar një foto nga stërvitja e tij me fanellën kuqezi, duke treguar përkushtimin e tij pavarësisht zgjedhjes së trajnerit.
Ky gjest është parë si një mesazh qetësie dhe mbështetjeje për grupin, ndonëse mbetet e qartë se mungesa e tij në protokollin zyrtar do të ndihet në opsionet taktike të krahut të djathtë gjatë 90 minutave në Varshavë.
