Silvinjo është shprehur se “nuk është ky momenti për një lojtar 21-22 vjeçar”, duke arsyetuar lënien jashtë të Anis Mehmetit nga lista për ndeshjen me Serbinë.
Sulmuesi shqiptar po kalon një periudhë shumë të mirë në Championship, ku spikat me gola dhe asiste pothuajse çdo javë. Ky është një kampionat i vështirë, ku edhe Rei Manaj nuk ia doli të përshtatej, pavarësisht tentativës për të luajtur në Angli.
Pavarësisht formës së lartë, trajneri brazilian nuk e ka parë të arsyeshme për ta thirrur në këtë grumbullim. Mehmeti mbetet një nga lojtarët më në formë në futbollin anglez për momentin.
Pas publikimit të listës, ai ka reaguar në rrjetet sociale me një buzëqeshje dhe një emoji, si një mesazh të tërthortë. Kjo sjellje shihet si një mënyrë për të treguar qetësinë dhe besimin në vetvete. Situata mbetet për t’u ndjekur në ndeshjet e ardhshme të Kombëtares.
