Mirlind Daku është bërë sërish objekt i fyerjeve antisportive në kampionatin rus. Mediat lokale raportojnë se sulmuesi shqiptar u sulmua verbalisht nga tifozët e Zenit Shën Petersburg gjatë ndeshjes së fundit të Kupës.
Ngjarja ka sjellë reagimin e Komisionit të Disiplinës në Federatën Ruse, i cili ka nisur hetimet dhe pritet të ndëshkojë klubin e Zenitit.
Ky nuk është rasti i parë kur Daku përballet me fyerje të tilla, ndërsa ngjarja e fundit mund të lidhet edhe me transferimin e dështuar të tij në merkaton e verës.
Zenit kishte arritur marrëveshjen për ta blerë lojtarin dhe sulmuesi kishte kryer vizitat mjekësore në Shën Petersburg, por marrëveshja nuk u finalizua.
Pas dështimit të kalimit, Daku u rikthye te Rubin Kazan ku rinovoi kontratën me një shifër rekord.
Deri tani zgjedhja e tij ka rezultuar e suksesshme, pasi ai ka shënuar 4 gola në 5 javët e para të kampionatit. Aktualisht, shqiptari renditet mes golashënuesve më të mirë të Premier Ligës ruse.
