Skandali i basteve, pezullohen mbi 1 mijë lojtar. Njëri luajti në Champions

Federata Turke e Futbollit ka pezulluar mbi një mijë lojtarë në kuadër të një hetimi të gjerë mbi baste të paligjshme. Ndër të pezulluarit është edhe mbrojtësi Eren Elmali, pjesë e Galatasaray në Champions League këtë sezon.

Lojtari 25-vjeçar pranoi se kishte vendosur një bast pesë vite më parë në një ndeshje që nuk përfshinte skuadrën e tij. Ai u përjashtua nga grumbullimi i kombëtares për ndeshjet kualifikuese ndaj Spanjës dhe Bullgarisë.

Së bashku me Elmali, edhe shoku i tij i skuadrës Metehan Baltaci është në mesin e 1,024 lojtarëve të dërguar për ndëshkim disiplinor. Federata vendosi gjithashtu pezullimin për dy javë të kategorive të tretë dhe të katërt, ndërsa ndeshjet e Superligës dhe të kategorisë së dytë do të zhvillohen normalisht.

Hetimi ka përfshirë edhe mbi 150 gjyqtarë të akuzuar për baste në ndeshje, përfshirë disa të nivelit të lartë. Presidenti i Federatës, Ibrahim Haciosmanoglu, tha se synimi është pastrimi i futbollit turk dhe rikthimi i integritetit të tij.