Kombëtarja shqiptare po kalon javë vendimtare, ku përpara miqësoreve të qershorit ndaj Izraelit dhe Luksemburgut duhet të saktësohet fati i stolit.
Kontrata e trajnerit Sylvinho është drejt skadencës dhe në tryezë ende mungon një ofertë zyrtare për konfirmimin e tij.
Pavarësisht kësaj situate, tekniku brazilian ka zgjedhur të fokusohet totalisht tek emrat e rinj për rritjen e cilësisë së skuadrës. Këto dy teste miqësore, që do të luhen më 3 dhe 6 qershor, do të shërbejnë për të provuar profile të reja.
Në qendër të vëmendjes së teknikut është portieri i talentuar Klintman Lilo, i cili aktivizohet në Greqi me OFI Kretën. Paraqitjet e gardianit të ri në Superligën greke kanë lënë të impresionuar Sylvinhon. Media greke “Sports 24” raporton se ekziston mundësia që trajneri t’i zgjasë atij ftesën për këto dy përballje.
Ky grumbullim shihet si mundësia ideale për të parë gjendjen e lojtarit në mjedisin kuqezi. Ende nuk ka një konfirmim konkret për listën, ndërsa gjithçka do të zbulohet në javët në vazhdim.
Gjatë kësaj periudhe pritet që të qartësohet plotësisht edhe e ardhmja e vetë Sylvinhos në krye të pankinës.
