Drilon Hazrollaj është afrimi i radhës te Tirana. Përmes një njoftimi zyrtar, bardheblutë bënë të ditur arritjen e marrëveshjes me klubin rumun FC Rapid 1923.
Anësori i djathtë 22-vjeçar nga Kosova i bashkohet kryeqytetasve me formulën e huazimit për një sezon. Në kontratën mes dy klubeve është përfshirë gjithashtu edhe klauzola e të drejtës së blerjes të kartonit në fund të sezonit. Lojtari i ri do të mbulojë repartin e avancuar, duke i dhënë më shumë zgjidhje taktike stafit teknik për objektivat e kampionatit.
Në të kaluarën e tij, ai spikati në Superligën e Kosovës me fanellën e Malishevës përpara se të transferohej në Rumani.
Vlen të theksohet fakti se Rapidi e bleu kartonin e 22-vjeçarit për një shumë të raportuar prej 900 mijë eurosh.
“KF Tirana ka kënaqësinë të njoftojë arritjen e marrëveshjes me Drilon Hazrollaj, i cili i bashkohet klubit në formë huazimi nga FC Rapid 1923, me të drejtë blerjeje përfundimtare të kartonit të lojtarit.
22-vjeçari nga Kosova aktivizohet në repartin ofensiv dhe vjen pas eksperiencave me FC Malishevën dhe FC Rapid 1923, duke shtuar një tjetër alternativë në organikën e skuadrës bardheblu për sezonin e ri.
Marrëveshja mes dy klubeve parashikon mundësinë që KF Tirana ta bëjë transferimin e lojtarit përfundimtar në përfundim të periudhës së huazimit, sipas kushteve të dakordësuara.
Mirë se erdhe në familjen bardheblu, Drilon! Të urojmë suksese me fanellën e KF Tiranës”, thuhet në njoftimin e klubit.
