Zëvendëstrajneri i kombëtares shqiptare, Ervin Bulku, ka sqaruar situatën e dy futbollistëve me origjinë shqiptare, Brajan Gruda dhe Nelson Weiper. Bulku konfirmoi se të dy lojtarët kanë refuzuar ftesën për t’u bashkuar me kuqezinjtë në këtë periudhë.
Menaxheri i Grudës ka kërkuar zyrtarisht nga stafi teknik që të mos e shqetësojnë klientin e tij për të paktën dy vitet e ardhshme. Sulmuesi dëshiron të përqendrohet maksimalisht te mundësitë e tij për të përfaqësuar skuadrën e parë të Gjermanisë.
“Ftesa e parë Brajan Grudës i është bërë shumë vite më parë, qëkur ishte 15 vjeç me ekipet kombëtare të moshave, por ai ka vendosur që të përfaqësonte moshat e Gjermanisë.
Jo më larg se dje kam pasur një komunikim, unë personalisht me të, bashkë me trajnerin, dhe na ka komunikuar nga menaxheri i tij që Brajanin duhet ta lëmë të qetë. Dhe të paktën për dy vite ose dhe më shumë, sepse do që të përfaqësojë skuadrën përfaqësuese të Gjermanisë.
Weiper ka vendosur që Europianin që do zhvillohet në vendin tonë, ta zhvillojë me kombëtaren e 21-vjeçarëve të Gjermanisë”, tha Bulku në emisionin në “Shtëpinë e Futbollit”, në FSHF TV.
