Portieri çek Martin Janaçek po kthehet në një nga emrat më të diskutuar në këtë periudhë të merkatos së verës.
Pas përfundimit të kontratës njëvjeçare me Elbasanin, palët nuk kanë gjetur një marrëveshje për të rinovuar bashkëpunimin.
Skuadra e Teutës po ndjek me interes situatën e tij, por oferta financiare do të jetë vendimtare për të ardhmen e lojtarit.
Përtej kampionatit shqiptar, në skenë ka dalë edhe një alternativë e rëndësishme nga kampionati sllovak i futbollit. Klubi i Spartak Trnava ka shfaqur interes konkret për të siguruar shërbimet e 25-vjeçarit për edicionin e ri.
Gjatë aventurës së tij me Elbasanin, Janaçek tregoi një formë të mirë, pavarësisht se një dëmtim në muajin mars e mbajti jashtë fushave për dy muaj.
Nëse transferimi në Sllovaki realizohet, portieri do të ketë mundësinë të luajë në turin e dytë kualifikues të Ligës së Konferencës.
