Trajneri i Flamurtarit, Francesco Moriero, ndodhet në prag të shkarkimit pas rezultateve të fundit që e kanë zhytur skuadrën vlonjate në fundin e tabelës me 19 pikë.
Ndeshja e së premtes kundër Egnatias konsiderohet vendimtare për të ardhmen e italianit, ku vetëm një rezultat pozitiv mund ta mbajë atë në detyrë. Fitorja e Tiranës ndaj rrogozhinasve ka rënduar pozitat e kuqezinjve, duke rritur presionin mbi stafin teknik për pikë mbijetese.
Burime pranë klubit konfirmojnë se Julian Ahmataj është kandidati kryesor për të marrë drejtimin e ekipit në rast largimi të Morieros.
Ahmataj, i cili së fundmi u largua nga drejtimi i Kombëtares U19, shihet si njeriu i duhur për shkak të përvojës së tij në Superiore dhe njohjes së ambientit vlonjat.
46-vjeçari ka qenë pjesë e Flamurtarit si futbollist në sezonin 2010-2011 dhe zotëron një karrierë të pasur si trajner me disa klube elitare. Vendimi përfundimtar pritet të merret menjëherë pas përfundimit të sfidës së radhës.
