Kukësi ka arritur marrëveshjen me trajnerin Bledar Devolli, i cili do të marrë drejtimin e skuadrës për pjesën e mbetur të sezonit.
Devolli zëvendëson Sedat Pajazitin, pas ndarjes me të javën e kaluar. Për 47-vjeçarin bëhet fjalë për një rikthim, pasi ai ka qenë më parë në krye të verilindorëve.
Trajneri gjirokastrit njihet mirë me ambientin dhe strukturën e klubit, çka pritet ta ndihmojë në adaptim të menjëhershëm. Ai ishte pa ekip që nga muaji shkurt i këtij viti.
Detyra e tij e parë do të jetë përmirësimi i rezultateve dhe rikthimi i stabilitetit në skuadër. Aktualisht Kukësi renditet në vendin e 10-të të klasifikimit me 4 pikë pas 6 javësh kampionat.
