Hije trukimi mbi Superligën e Kosovës. Sipas raportimeve të emisionit “Dueli Sportiv”, ndeshja e vlefshme për javën e 21-të mes Llapit dhe Dritës, e zhvilluar më 22 shkurt, është vënë nën hetim për dyshime për trukim.
Sfida, e cila përfundoi me rezultatin 0-2 për gjilanasit, pati një peshë të madhe në renditjen e kampionatit, pasi i siguroi Dritës kreun e klasifikimit.
Ky zhvillim vjen në një moment delikat për Dritën, e cila sapo ka mbyllur aventurën e saj europiane. Gjilanasit u eliminuan nga Liga e Konferencës, ndonëse bënë histori duke qenë ekipi i vetëm nga Kosova që arriti deri në fazën e “play-off”-it të këtij kompeticioni.
Hetimi mbi këtë ndeshje ka tronditur opinionin sportiv në Kosovë, ndërsa priten të tjera detaje lidhur me provat apo hapat që do të ndërmarrin organet kompetente sportive.
