Një ngjarje e pazakontë ka ndodhur në stadiumin “Elbasan Arena” gjatë sfidës mes Elbasanit dhe Partizanit, ku u përfshi përgjegjësi i materialeve të ekipit vendas, Klaudio Allkja.
Në minutën e 50-të, ndërsa po pritej ekzekutimi i penalltisw, Allkja iu afrua portierit tw Partizanit, duke shkaktuar tension dhe vonesë të lojës për rreth 90 sekonda.
Gjyqtari i ndeshjes e ndëshkoi menjëherë zyrtarin me karton të kuq, duke e larguar nga fusha e lojës. Ky veprim pritet të sjellë sërish masa ndëshkimore nga Komisioni i Disiplinës, pasi personi në fjalë ishte dënuar më parë në muajin shkurt.
Atë kohë, ai u pezullua me tetë ndeshje për sulm ndaj lojtarëve të Vllaznisë në përfundim të takimit të zhvilluar në Shkodër. Rikthimi i tij në fushë pas dënimit të parë u shoqërua sërish me sjellje josportive që penalizojnë klubin e Elbasanit.
Tashmë mbetet në dorën e organeve kompetente vlerësimi i këtij rasti të përsëritur brenda një kohe të shkurtër.
