Një episod i rrallë dhe i pazakontë është regjistruar në Superiore gjatë ndeshjes Egnatia-Flamurtari, ku mbrojtësi Arbenit Xhemajli është ndëshkuar me karton të kuq pasi gjyqtari kishte vërshëllyer fundin e pjesës së parë.
Kryesori Laver Alla sinjalizoi mbylljen e 45 minutave të para, por vetëm pak sekonda më pas, ai kërkoi rikthimin e menjëhershëm të skuadrave në fushën e lojës.
Shkak për këtë vendim drastik u bë një ndërhyrje mjaft e rëndë e Xhemajlit ndaj sulmuesit Bintsuka, e cila i kishte shpëtuar syrit të gjyqtarit në lojë e sipër.
Pas komunikimit me dhomën VAR, Alla rishikoi pamjet në monitor dhe vendosi të ndëshkonte mbrojtësin e rrogozhinasve me karton të kuq, duke e lënë Egnatian me dhjetë lojtarë për pjesën e mbetur të takimit.
Vlonjatët shkuan në dhomat e zhveshjes në avantazh, falë një autogoli.
