Skënderbeu po punon për trajnerin e ri për sezonin e ri në Kategorinë Superiore, pas mbylljes së bashkëpunimit me Ernest Gjokën.
Sipas raportimeve të fundit nga “ligasport.al”, drejtuesit e klubit juglindor kanë arritur një akord me teknikun Oltjon Kërnaja.
37-vjeçari tropojan vjen pas një eksperience në krye të pankinës së Partizanit, skuadër të cilën e drejtoi përgjatë një pjese të mirë të këtij sezoni, përpara se të ndërpiste marrëveshjen në fund të muajit prill.
Kërnaja shihet si një profil i ri dhe ambicioz, i gatshëm për të marrë në dorë frenat e projektit të ri korçar në elitë.
Negociatat mes palëve kanë avancuar me shpejtësi dhe zbarkimi i tij në qytetin e Korçës pritet të ndodhë në ditët në vazhdim për të hedhur firmën mbi kontratë.
Zyrtarizimi i tij në krye të stolit bardhekuq do të jetë lëvizja e parë zyrtare që do të zhbllokojë edhe strategjinë e klubit për merkaton e verës dhe përforcimet e organikës.
