Aston Villa është fituesja e Europa League për sezonin 2025-2026. Skuadra angleze fitoi bindshëm me rezultatin 3-0 përballë skuadrës gjermane Freiburg në finalen e zhvilluar në “Besiktas Park”.
Ky sukses shënon rikthimin e klubit anglez te trofetë madhorë pas tre dekadash dhe i jep fund një pritjeje 44-vjeçare për një titull europian, duke pasuar triumfin në Kupën e Europës në vitin 1982. Për teknikun spanjoll, ky është triumfi i pestë personal në këtë kompeticion, duke konfirmuar dominimin e tij statistikor në Europa League.
Aston Villa dominoi pjesën e parë dhe para pushimit gjeti avantazhin. Pas një skeme nga goditja e këndit, Youri Tielemans kaloi anglezët në avantazh me një goditje fluturimthi nga jashtë zonës, duke dërguar topin në rrjetë.
Përpara se të mbyllej pjesa e parë, Aston Villa thelloi diferencën. Në minutat shtesë, Emiliano Buendía realizoi golin e dytë me një goditje të harkuar nga hyrja e zonës së rreptësisë. Në pjesën e dytë, shpresat e Freiburgut për një reagim u shuan shpejt. Morgan Rogers vulosi ndeshjen duke shënuar golin e tretë për Aston Villën, pasi shfrytëzoi një krosim të ulët nga Buendía për ta shtyrë topin drejt e në portë.
Me këtë fitore, Aston Villa mbyll një sezon mjaft pozitiv, i cili u shoqërua gjithashtu me sigurimin e një vendi në pesëshen e parë të Premier League.
