Sulmuesi i kombëtares shqiptare, Armando Broja, mbeti jashtë grumbullimit për ndeshjen miqësore që Burnley zhvilloi përballë Ajax-it.
Sfida e zhvilluar në stadiumin “Johan Cruijff Arena” përfundoi me fitoren 2-1 të skuadrës holandeze. Mungesa e 24-vjeçarit në listën e lojtarëve ka ngritur pikëpyetje, për shkak se klubi nuk ka njoftuar ndonjë dëmtim fizik të tij.
Në përballjet e mëparshme përgatitore gjatë turneut në Shtetet e Bashkuara të Amerikës, sulmuesi kishte marrë hapësira si titullar në fushë. Megjithatë, me rikthimin e skuadrës në Evropë, vendimet e stafit teknik sollën lënien e tij jashtë minutave të lojës.
Kjo situatë ka shtuar zërat mbi një largim të mundshëm të futbollistit gjatë kësaj periudhe të merkatos. Për shërbimet e lojtarit shqiptar është përfolur se ka interesime nga kampionati italian, ku spikat emri i Cagliarit.
E ardhmja e sulmuesit pritet të qartësohet gjatë javëve të ardhshme në varësi të lëvizjeve të klubit.
