Skënderbeu U-19 ka përfunduar rrugëtimin në UEFA Youth League në raundin e dytë. Ekipi korçar zhvilloi një paraqitje dinjitoze në kompeticion, duke fituar bindshëm ndaj Inter Escaldes dhe barazuar 1-1 me Aston Villën në ndeshjen e parë në Shqipëri.
Pas atij rezultati, mediat angleze raportuan pretendime për kore raciste, të cilat nuk u vërtetuan nga asnjë organ zyrtar. Në ndeshjen e kthimit, Aston Villa U-19 u paraqit me një formacion të përforcuar, duke përfshirë disa lojtarë nga grupmoshat e tjera.
Pas kësaj “hileje”, skuadra angleze arriti të fitonte me rezultatin 6-0 dhe të siguronte kalimin në fazën finale.
Pavarësisht eliminimit, Skënderbeu u vlerësua për performancën e tij dhe për organizimin në ndeshjet e zhvilluara në Korçë.
