Rënia e Flamurtarit në Kategorinë e Parë është shoqëruar me tensione të larta dhe polemika të forta ndaj gjykimit në sfidën vendimtare kundër Teutës.
Vlonjatët, të cilët kishin nevojë vetëm për fitoren për të mbajtur gjallë shpresat e mbijetesës, u ndalën në një barazim që i zbriti zyrtarisht nga elita.
Episodi që ka revoltuar më shumë kampin kuqezi ndodhi në minutën e 93-të, kur lojtarët dhe stafi i Andi Ribajt kërkuan me ngulm një penallti për prekje të topit me dorë nga mbrojtësi i Teutës, Artan Jazxhi.
Pavarësisht protestave të shumta të futbollistëve dhe tensionit në stolin vlonjat, arbitri Eldorjan Hamiti vendosi të mos e rishikonte episodin në sistemin VAR, duke vijuar lojën.
Ky vendim la një shije të hidhur te Flamurtari, që e konsideron veten të dëmtuar në momentin më kritik të sezonit.
Tashmë, pas një lufte të gjatë në Superiore, skuadra vlonjate duhet të nisë përgatitjet për një tjetër rrugëtim në Kategorinë e Parë, mes zhgënjimit për mënyrën se si u mbyll ky kapitull.
