Paris Saint-Germain është finalisti i dytë i Champions League, duke u bërë klubi i parë francez që arrin në tre finale të këtij kompeticioni. Pas barazimit 1-1 në Mynih ndaj Bayern Munich, parisienët siguruan kualifikimin me rezultatin e përgjithshëm 6-5.
Ndeshja nisi në mënyrë perfekte për djemtë e Luis Enrique. Pas vetëm tre minutash lojë, Kvaratskhelia shërbeu për Ousmane Dembélé, i cili me një goditje të saktë heshti “Allianz Arena”-n dhe kaloi miqtë në avantazh.
Bayern u hodh i gjithi në sulm në kërkim të barazimit, me Luis Díaz dhe Michael Olise që rrezikuan disa herë. Tensioni u rrit kur vendasit kërkuan një penallti për prekje të topit me dorë nga João Neves, por arbitri la lojën të vazhdonte, duke tërbuar trajnerin Vincent Kompany.
Portieri i PSG-së, Safonov, bëri heroin në fund të pjesës së parë, duke ndalur Musiala-n me një pritje spektakolare dhe duke ruajtur qetësinë e kampionëve në fuqi.
Në pjesën e dytë, Parisi tregoi një pjekuri të rrallë në mbrojtje, duke kontrolluar hovin e gjermanëve. Ndonëse Harry Kane gjeti golin e barazimit në fund të takimit me një goditje të fuqishme, ishte tepër vonë për bavarezët.
PSG eliminoi Bayern Munich për të nisur fluturimin drejt Budapestit për finalen e madhe të 30 majit. Aty i pret Arsenal, në një përballje “kokë më kokë” ku Luis Enrique do të kërkojë trofeun e dytë radhazi dhe të tretin në karrierën e tij si trajner.
![asat mala]](https://vetemsport.com/wp-content/uploads/2026/06/asat-mala-768x508.png)
