Senegali ka emëruar Patrick Vieira-në në postin e trajnerit të kombëtares, duke i besuar drejtimin e skuadrës ish-kampionit të botës me Francën në vitin 1998.
Federata Senegaleze e Futbollit e zyrtarizoi emërimin të martën, më 18 gusht 2026. Vieira zëvendëson Pape Thiaw, i cili u shkarkua pas përfundimit të Botërorit të fundit.
I lindur në Senegal, por kampion bote me Francën në vitin 1998, Vieira rikthehet tashmë në vendin e origjinës për të nisur një kapitull të ri në karrierën e tij si trajner.
Federata e ka cilësuar emërimin e 50-vjeçarit si një “lëvizje strategjike”, me synimin për të krijuar një strukturë teknike të nivelit të lartë, në përputhje me ambiciet sportive të vendit.
Vieira ka një karrierë të gjatë edhe si trajner në futbollin europian. Ai ka drejtuar ndër të tjera Nju Jork City-n në MLS, Nice në Francë, Crystal Palace në Premier League dhe Strasburgun në Francë.
Si futbollist, Vieira ishte një prej mesfushorëve më të rëndësishëm të gjeneratës së tij. Ai fitoi Kupën e Botës me Francën në vitin 1998 dhe ishte pjesë e skuadrës franceze që triumfoi edhe në Kampionatin Europian të vitit 2000.
