Ndonëse sezoni aktual ende nuk ka përfunduar zyrtarisht për shkak të ndeshjeve të mbetura të fazës “Final 4” dhe asaj play-out, për skuadrën e Partizanit kanë nisur pushimet.
Ky pushim u ka dhënë mundësi futbollistëve të nisin planifikimin për të ardhmen e tyre profesionale, ku njëri prej tyre ka vendosur të largohet. Bëhet fjalë për sulmuesin azer, Vusal Isgandarli, i cili po mbyll një aventurë njëvjeçare me ekipin e kuq.
Gjatë kësaj periudhe me “Demat”, 30-vjeçari arriti të realizojë gjashtë gola në total. Ndarja mes palëve konsiderohet e sigurt, pasi lojtari ka marrë vendimin për të mos e rinovuar kontratën aktuale.
Isgandarli shënon kështu largimin e parë zyrtar nga radhët e kryeqytetasve pas përfundimit të kampionatit. Gjatë ditëve në vijim pritet që nga skuadra të largohen edhe disa futbollistë të tjerë.
Ndryshimet në organikë do të marrin formë të plotë sapo të zyrtarizohet emri i trajnerit të ri. Me ardhjen e teknikut të ri do të nisë edhe puna konkrete për rindërtimin e grupit për edicionin pasardhës. Pritshmëritë janë që skuadra të pësojë ndryshime të shumta dhe rrënjësore në përbërjen e saj.
