Java e 32-të në Superiore, ka nisur me surpriza. Vllaznia nuk shkoi më shumë se barazimi pa gola në transfertë ndaj Vorës.
Në një ndeshje shumë të luftuar dhe më raste, dy ekipet u detyruan të ndajnë nga një pikë.
Pjesa e pareë foli më shumë për Vorën, që pati disa mundësi për shënim. Felipe dërgoi topin në rrjetë në minutën e 35-të, por goli u anulua për pozicion jashtë loje.
Në fraksionin e dytë, edhe Vllaznisë iu anulua një gol për pozicion jashtë loje. Çelikoviç ishte i pafat edhe në minutën e 83-të, kur pa tentativën e tij të ndalej nga tranversa.
Me këtë barazim, Vllaznia mbetet në krye me 60 pikë, ndërsa Vora renditet në vendin e shtatë me 32 pikë.
Në duelin tjetër, Flamurtari i vendit të fundit, triumfoi 0-2 në transfertë ndaj Egnatias. Vlonjatët zhbllokuan takimin shumë shpejt, falë autogolit të Jaime.
Në fundin e pjesës së parë Egnatia mbeti me 10 lojtarë, pasi Xhemajli u ndëshkua me të kuq.
Në superioritet numerik, miqtë gjetën edhe golin e dytë në minutën e 53-të me Ememe.
Me këtë sukses, Flamurtari ngjitet në kuotën e 29 pikëve në vendin e fundit dhe vazhdon luftën për mbijetesë. Egnatia renditet në vendin e tretë me 54 pikë.
