Vllaznia do të përballet me një mungesë të rëndësishme përpara ndeshjes ndaj Partizanit, pasi portieri titullar Aron Jukaj do të mungojë për të paktën një muaj.
Ai u dëmtua gjatë ndeshjes së Kombëtares U-21 ndaj Zvicrës, ku pësoi një përplasje me shtyllën në episodin e autogolit të tij.
Pas ndërhyrjes së stafit mjekësor dhe kontrolleve të mëvonshme, u konfirmua një dëmtim në shpatull. Ky zhvillim pritet të sjellë ndryshime në skuadër, pasi Jukaj kishte fituar vendin e titullarit ndaj gjermanit Pohls. Tani, detyra në portë do t’i kalojë sërish Pohlsit.
Stafi teknik duhet të riorganizojë skuadrën për të përballuar këtë mungesë në një rol të rëndësishëm. Skuadra shkodrane synon rikthimin te fitorja në sfidën e fundjavës ndaj Partizanit. Mungesa e Jukajt mbetet një sfidë për ekuilibrin e kuqebluve.
