Tensionet pas Elbasani-Vllaznia duket se kanë qenë shumë më të mëdha nga sa u pa fillimisht. Pas incidentit të presidentit të Vllaznisë, Alban Xhaferi, me asistentin e arbitrit, Ergys Spahiu, një tjetër përplasje mësohet të ketë ndodhur në ambientet pranë stadiumit.
Mësohet se trajneri i Vllaznisë, Edi Martini, është përplasur me delegatin e ndeshjes, zyrtarin e FSHF-së, Bujar Pregja, teksa po largohej nga stadiumi.
Situata mes tyre ka qenë tepër e tensionuar dhe për pak ka kaluar në konfrontim fizik. Të dy palët janë përplasur verbalisht, ndërsa situata është qetësuar përpara se konflikti të përshkallëzohej më tej.
Gjatë debatit Martini i është drejtuar Pregjës edhe me fjalë kërcënuese. Një episod tjetër që tregon atmosferën e tensionuar që shoqëroi fundin e sfidës Elbasani-Vllaznia, e cila përfundoi 1-1, por që përtej rezultatit do të mbahet mend edhe për ngjarjet e rënda pas ndeshjes.
Pas incidentit Xhaferi-Spahiu, tashmë në skenë del edhe përplasja Martini-Pregja, duke e bërë mbrëmjen e Superiores në Elbasan edhe më të nxehtë.
