Vora bëri surprizën në javën e 33-të në Superiore, duke mposhtu 2-0 Egnatian në transfertë.
Sukses i rëndësishëm për skuadrën e Bellait, në luftën për mbijetesë në elitë. Ndeshja në Rrogozhinë u vendos nga dy episode dhe nga dopieta e Kasallës.
Në minutën e 4-t, një gafë e portierit Tandilashvilit, u shfrytëzua nga Kasalla, i cili zhbllokoi takimin. Egnatia provoi të reagojë dhe iu afrua barazimit, por pa sukses.
Në minutën e 26-të, Vora shënoi edhe të dytin. Këtë herë, Kasalla u tregua i saktë nga pika e penalltisë, për të dyfishuar shifrat.
Në fund të fraksionit të parë, Egnatia iu afrua golit me Bakayoko dhe Albanese, të cilët nuk shënuan dot.
Fraksioni i dytë ishte i qetë dhe pa raste të pastra. Në minutën e 80-të, Egnatia gjeti golin, por u anulua për pozicion jashtë loje.
Me këtë fitore, Vora ngjitet në kuotën e 35 pikëve, po aq sa Tirana dhe Bylis, që luftojnë për mbijetesë dhe lë pas Flamurtarin e vendit të fundit.
Egnatia mban vendin e tretë me 54 pikë të grumbulluara., ndërsa kjo është humbja e tretë radhazi në kampionat.
