“Plas” në Superligë, akuza për trukim ndeshje

Superliga e Kosovës është përfshirë nga një dallgë e fortë polemikash vetëm dy javë para mbylljes së kampionatit, pas akuzave të rënda për trukim ndeshjesh.

Zëvendëspresidenti i Ballkanit, Bali Kabashi, ka komentuar publikisht në rrjete sociale, ku thotë se sfida mes Dritës dhe Llapit është e manipuluar dhe se fituesi është përcaktuar paraprakisht.

Këto pretendime vijnë në një moment kritik të garës, ku Drita kryeson tabelën me 57 pikë, pesë më shumë se Ballkani ndjekës. Deri më tani, Federata e Futbollit e Kosovës dhe organet e drejtësisë nuk kanë lëshuar asnjë njoftim zyrtar lidhur me këto akuza që cenojnë integritetin e garës.

Nëse Drita arrin të fitojë ndeshjen e radhës ndaj Prishtinës, ajo siguron matematikisht mbrojtjen e titullit kampion. Situata mbetet e tensionuar, ndërsa pritet të shihet nëse këto deklarata do të nisin një hetim të thelluar nga komisionet përkatëse.