Sulmuesi anësor Bernard Berisha ka mbyllur zyrtarisht aventurën e tij me klubin e Dinamos, duke ndërprerë bashkëpunimin me blutë e kryeqytetit pas vetëm një viti qëndrimi.
Largimi i tij vjen pas një sezoni ku lojtari nuk gjeti hapësirat e mjaftueshme në formacion dhe ku u përfol shpesh në media për mospërputhje dhe përplasje me trajnerin Ilir Daja lidhur me minutazhin në fushë.
Përmes një mesazhi falënderues në rrjetet sociale, Berisha konfirmoi se tashmë është një lojtar i lirë, duke shprehur mirënjohje për presidentin, stafin teknik, shokët e skuadrës dhe tifozët dinamovitë.
Ndërsa i uroi suksese klubit për të ardhmen, futbollisti bëri me dije se shumë shpejt do të zyrtarizojë projektin e tij të ri në karrierë.
