Klubi i Devollit ka bërë një lëvizje surprizë në stol, duke vendosur të rikthejë në krye të pankinës trajnerin Erindi Maneshi.
Kjo rokadë vjen menjëherë pas dorëheqjes së teknikut korçar, Vasjan Ballço, i cili u largua nga drejtimi i juglindorëve pas disfatës së rëndë ndaj Orikut.
Ajo që e bën interesante këtë lëvizje është fakti se Maneshi e nisi sezonin si trajner i Devollit, duke e drejtuar ekipin në katër javët e para, përpara se t’i lironte vendin pikërisht Ballços.
Tashmë, drejtuesit kanë parë të arsyeshme rikthimin e protagonistit të fillimsezonit, me shpresën se ai do të rikthejë qetësinë dhe rezultatet pozitive te bardheblutë në Grupin B të Kategorisë së Dytë.
Sfida e parë për Maneshin në këtë aventurë të dytë brenda të njëjtit edicion do të jetë ajo ndaj Bylisit B, ku fitorja është detyrim për të përmirësuar pozitat në renditje.
