Humbja e rëndë në javën e 15-të të Kategorisë së Dytë ka sjellë tërmet në stolin e Devollit, duke çuar në largimin e trajnerit Vasian Ballço.
Disfata e thellë 4-0 përballë Orikut, ku fati i takimit u vulos që në pjesën e parë, e shtyu teknikun të merrte vendimin drastik për t’u tërhequr, vendim të cilin ua komunikoi futbollistëve menjëherë pas ndeshjes.
Pas një takimi të zhvilluar sot me drejtuesit e klubit, palët kanë arritur në konkluzionin e përbashkët se ndarja e rrugëve ishte zgjidhja më e mirë për të mirën e skuadrës, duke bërë që klubi të nisë menjëherë kërkimet për një emër të ri në stol.
Nën drejtimin e Ballços, Devolli nuk arriti të ishte në lartësinë e pritshmërive në Grupin B, duke u pozicionuar aktualisht në vendin e 8-të me vetëm 13 pikë pas 14 ndeshjesh, larg zonës që pretendon ngjitjen në një kategori më lart.
