Tirana ka dalë me një njoftim zyrtar për publikun dhe mbështetësit e saj lidhur me vendimin e fundit të organeve disiplinore.
Klubi kryeqytetas njofton se Komisioni i Disiplinës dhe Etikës pranë FSHF-së e ka dënuar me dy ndeshje pa praninë e spektatorëve. Si rrjedhojë e këtij sanksioni, përballja e radhës që bardheblutë do të zhvillojnë si vendas ndaj Vorës do të luhet me dyer të mbyllura.
Drejtuesit e klubit shprehën keqardhjen e tyre për mungesën e detyruar të tifozërisë në shkallët e stadiumit.
NJOFTIM ZYRTAR
KF Tirana njofton të gjithë tifozërinë bardheblu dhe opinionin sportiv se, në zbatim të vendimit të Komisionit të Disiplinës dhe Etikës pranë FSHF-së, klubi është dënuar me zhvillimin e dy ndeshjeve pa praninë e spektatorëve.
Për rrjedhojë, ndeshja e ardhshme që KF Tirana do të zhvillojë në shtëpi do të luhet me dyer të mbyllura, pa praninë e tifozëve në stadium.
Na vjen keq që skuadra do të duhet t’i zhvillojë këto ndeshje pa mbështetjen e drejtpërdrejtë të tifozërisë sonë, e cila ka qenë dhe mbetet pjesë e pandashme e identitetit, historisë dhe forcës së KF Tiranës.
Pa ju në tribunë. Me ju në fushë.
