Sulmuesi Fatmir Prengaj ka njoftuar zyrtarisht mbylljen e bashkëpunimit me klubin e Vorës përmes një mesazhi në rrjetet sociale.
Përmes këtij komunikimi, 25-vjeçari ka falënderuar presidentin për besimin e dhënë, si dhe shokët e skuadrës dhe tifozët për mbështetjen e vazhdueshme gjatë qëndrimit të tij. Ky vendim ka ardhur në mënyrë të papritur, pasi ndryshe nga praktikat e zakonshme ku largimet konfirmohen fillimisht nga vetë klubi, lojtari ka preferuar ta bëjë vetë publik lajmin.
Prengaj mbyll kështu një periudhë të ndikuar ndjeshëm nga problemet fizike, ku iu desh të përballonte një kohë të gjatë rikuperimi nga dëmtimi.
Gjatë pjesës së dytë të kampionatit, ai u aktivizua në nëntë ndeshje, por për shkak të hapësirave të kufizuara në dispozicion nuk arriti të gjente rrugën e rrjetës. Tashmë, futbollisti do të jetë lojtar i lirë për të negociuar me skuadrat e tjera për sezonin e ri sportiv.
