Trajneri portugez Sergio Conceicao dhe klubi i Arabisë Saudite, Al Ittihad, kanë ndërprerë zyrtarisht bashkëpunimin mes tyre me efekt të menjëhershëm.
Tekniku 51-vjeçar largohet nga drejtimi i skuadrës pasi u emërua në këtë detyrë në tetor të vitit 2025, pa arritur të përmbushte pritshmëritë e drejtuesve të klubit.
Ky ndryshim në stafin teknik prek edhe mbrojtësin e Kombëtares shqiptare, Mario Mitaj, i cili aktivizohet në radhët e këtij ekipi dhe kishte gjetur hapësira të kufizuara nën drejtimin e portugezit.
Gjatë periudhës së tij në krye të Al Ittihad, Conceicao e drejtoi skuadrën në 41 ndeshje zyrtare, duke regjistruar një bilanc prej 21 fitoresh, 7 barazimesh dhe 13 humbjesh.
Sipas raportimeve të gazetarit Fabrizio Romano, trajneri ka nisur bisedimet me disa klube europiane për të filluar një projekt të ri në kontinentin e vjetër.
