Prishtina ka njoftuar se Arsim Thaqi nuk do të vazhdojë si trajner i tyre. “Rrufe” në qiell të hapur për Superligën, pasi Prishtina kryeson renditjen e përgjithshme.
Thaqi u emërua në prillin e këtij viti, ndërsa kontrata i përfundonte në fundin e sezonit. Tri rezultatet e fundit kanë zhgënjyer kryeqytetasit dhe ndarja nuk është pritur më gjatë.
Fillimisht u humb ndeshja me Llapin, më pas u regjistrua barazimi ndaj Gjilanit. Së fundmi ishte humbja me Malishevën që vulosi çdo gjë.
Njoftimi i Prishtinës:
“FC Prishtina njofton se ka përmbyllur bashkëpunimin me trajnerin Arsim Thaqi, me marrëveshje të dyanshme.
E falënderojmë trajnerin Thaqi për kontributin e tij të çmuar gjatë periudhës sa ishte në krye të ekipit të parë, si dhe i dëshirojmë shumë suksese në të ardhmen. FC Prishtina dhe trajneri Thaqi mbeten të hapur për bashkëpunime të mundshme në të ardhmen.
Trajneri Thaqi mori drejtimin e skuadrës në prill të vitit të kaluar, duke e udhëhequr klubin drejt triumfit në Kupën e Kosovës dhe pjesëmarrjes në garat evropiane. Nën drejtimin e tij, gjatë sezonit aktual pas 14 xhirove, FC Prishtina ka tubuar 26 pikë, duke kryesuar renditjen me 3 pikë avantazh ndaj vendit të dytë.
FC Prishtina i uron trajnerit Arsim Thaqi suksese të mëtejshme profesionale dhe personale”.
