Edlir Tetova ka zyrtarizuar largimin e tij nga pankina e Egnatias në përfundim të këtij sezoni.
Përmes një konference për mediat, trajneri durrsak konfirmoi se ky ishte një vendim personal, i marrë pas diskutimeve me presidentin e klubit, Agim Demrozi.
Tetova shpjegoi se do të vazhdojë ta drejtojë skuadrën deri në fund të edicionit aktual, me synimin për ta mbyllur rrugëtimin e tij të suksesshëm me një tjetër trofe përpara se të nisë një aventurë të re në karrierë.
Ky njoftim i jep fund spekulimeve dhe konfirmon mbylljen e një prej cikleve më të lavdishme në historinë e klubit rrogozhinas, ku Tetova arriti të fitonte dy tituj kampionë dhe dy Kupa të Shqipërisë.
