Ndeshja vendimtare mes Laçit dhe Pogradecit, e cila vulosi rikthimin e kurbinasve në Superiore, u shoqërua me tensione të larta mes dy stafeve teknike.
Pas përfundimit të takimit, trajnerët Naxhi Shensoj dhe Emiljano Çela u përfshinë në një përplasje verbale që degjeneroi në tentativë për konfrontim fizik.
Shensoj u shfaq mjaft i irrituar ndaj kolegut të tij, duke kërkuar përballjen, por ndërhyrja e pjesëtarëve të tjerë të stafit parandaloi përkeqësimin e situatës.
Tensioni ishte aq i madh sa u desh ndërhyrja e stjuardëve dhe forcave të rendit për të qetësuar trajnerin e Laçit. Ky i fundit u shoqërua nga policia jashtë fushës së lojës për të shmangur incidentet e mëtejshme në ambientet e stadiumit.
