Mesfushori Endri Çekiçi ka nënshkruar zyrtarisht një kontratë me klubin Zakho SC, duke u bërë pjesë e elitës së futbollit në Irak.
29-vjeçari ka vendosur ta vazhdojë karrierën e tij në këtë kampionat për pjesën e mbetur të sezonit aktual. Për shërbimet e ish-lojtarit të Kombëtares shqiptare interesim konkret kishte shfaqur edhe ekipi i Tiranës.
Megjithatë, klubi bardheblu nuk arriti të konkretizonte marrëveshjen me fantazistin. Para këtij transferimi, Çekiçi ishte pjesë e klubit Belouizdad në kampionatin e Algjerisë. Gjatë eksperiencës së tij atje, ai kontribuoi me një gol të shënuar dhe një asist.
Tashmë, lojtari shqiptar do të nisë një etapë të re profesionale në Lindjen e Mesme. Kjo lëvizje shton një tjetër kampionat të huaj në CV-në e pasur të mesfushorit pogradecar.
