E ardhmja e kapitenit Albano Aleksi te skuadra e Egnatias është kthyer në një nga çështjet më të diskutuara të kësaj periudhe merkatoje.
Raportet mes mesfushorit 33-vjeçar dhe trajnerit të ri Nevil Dede janë ftohur ndjeshëm, duke vendosur në pikëpyetje qëndrimin e tij në Rrogozhinë.
Sipas “Klikoje”, tekniku ia ka bërë të qartë lojtarit se nuk e projekton atë si pjesë të skemave të tija për sezonin e ri. Tensioni mes palëve nisi pas disa episodeve negative në ndeshjet e fundit, çka bëri që kapiteni të humbiste vendin në formacion.
Megjithatë, zgjidhja e bashkëpunimit mbetet e ndërlikuar për shkak se futbollisti ka rinovuar së fundmi marrëveshjen edhe për dy vite të tjera. Sipas asaj që raportohet nga burimi i sipërpërmendur, në një bisedë të zhvilluar me presidentin Agim Demrozi, mesfushori ka kërkuar dëmshpërblim financiar prej 100 mijë eurosh në rast se klubi vendos ta largojë para kohe.
Nga ana tjetër, lojtari ka shprehur gjithashtu gatishmërinë për të qëndruar në skuadër edhe duke pranuar rolin e zëvendësuesit. Ndërkaq, drejtuesit e kampionëve në fuqi ndodhen përballë një vendimi delikat për të mos rënduar arkat e klubit.
