Tabloidi britanik “The Sun” i ka kushtuar një hapësirë të veçantë kualifikimit zyrtar të Argjentinës në Kampionatin Botëror të vitit 2030.
Përfaqësuesja nga Amerika Latine nuk do të ketë nevojë të harxhojë energji në fazën eliminatore për të prerë biletën në këtë turne. Ky lehtësim vjen pas një vendimi historik të FIFA-s për të zgjeruar numrin e vendeve nikoqire në gjashtë shtete për të festuar 100-vjetorin e këtij kompeticioni.
Si rrjedhojë e këtij vendimi, Spanja, Portugalia, Maroku, Argjentina, Uruguai dhe Paraguai e kanë të garantuar praninë e tyre në turne. Tri përfaqësueset nga Amerika e Jugut do të kenë privilegjin të mirëpresin nga një përballje në tokën e tyre gjatë fazës së grupeve.
Kjo skemë e re do t’i lejojë nënkampionëve të botës të planifikojnë me qetësi strategjinë e tyre afatgjatë pa presionin e eliminatoreve.
